საქართველოს გენერალურმა პროკურორმა გიორგი გვარაკიძემ თურქეთის რესპუბლიკის უმაღლესი სააპელაციო სასამართლოს გენერალურ პროკურორთან, მუჰსინ შენტურკთან შეხვედრა გამართა

საქართველოს გენერალურმა პროკურორმა გიორგი გვარაკიძემ თურქეთის რესპუბლიკაში, ბალკანეთის ქვეყნების გენერალური პროკურორების სამუშაო ფორუმის ფარგლებში, თურქეთის რესპუბლიკის უმაღლესი სააპელაციო სასამართლოს გენერალურ პროკურორთან, მუჰსინ შენტურკთან შეხვედრა გამართა. შეხვედრაზე მხარეებმა საქართველოსა და თურქეთის რესპუბლიკის კომპეტენტურ უწყებებს შორის სისხლის სამართლის სფეროში არსებულ მჭიდრო და ეფექტიან თანამშრომლობაზე ისაუბრეს. აღინიშნა ორ ქვეყანას შორის საპროკურორო თანამშრომლობის მიმართულებით მიღწეული მნიშვნელოვანი შედეგები და გამოითქვა მზაობა სამომავლოდ ურთიერთთანამშრომლობის კიდევ უფრო გაღრმავების შესახებ. მხარეებმა ხაზი გაუსვეს ერთობლივი ძალისხმევით თანამშრომლობის შემდგომი განვითარების მნიშვნელობას. საქართველოს გენერალურმა პროკურორმა თურქეთის რესპუბლიკის უმაღლესი სააპელაციო სასამართლოს გენერალური პროკურორი, მუჰსინ შენტურკი საქართველოში ოფიციალური ვიზიტით მოიწვია. ბალკანეთის ქვეყნების გენერალური პროკურორების სამუშაო ფორუმის ფარგლებში გამართულ ორმხრივ შეხვედრას ესწრებოდნენ საქართველოს გენერალური პროკურორის პირველი მოადგილე კახაბერ მურადაშვილი, გენერალური პროკურორის მოადგილე ზურაბ ბელთაძე, საქართველოს გენერალური პროკურატურის საერთაშორისო ურთიერთობების დეპარტამენტის უფროსი გიორგი მიქავა, თურქეთის რესპუბლიკაში საქართველოს ელჩი არჩილ კალანდია და თურქეთის რესპუბლიკის გენერალური პროკურატურის წარმომადგენლები. საქართველოს გენერალური პროკურორი გიორგი გვარაკიძე საქართველოს პროკურატურის წარმომადგენლებთან ერთად ბალკანეთის ქვეყნების გენერალური პროკურორების სამუშაო ფორუმში სპეციალური მიწვევით, სტუმრის სტატუსით მონაწილეობს.

27 ოქტომბერი, 2026

საქართველოს გენერალური პროკურორი გიორგი გვარაკიძე სპეციალური მოწვევით, ბალკანეთის ქვეყნების გენერალური პროკურორების სამუშაო ფორუმში მონაწილეობს

საქართველოს გენერალური პროკურორი გიორგი გვარაკიძე, პროკურატურის წარმომადგენლებთან ერთად, სპეციალური მოწვევით, ბალკანეთის ქვეყნების გენერალური პროკურორების სამუშაო ფორუმში მონაწილეობს. ფორუმი თურქეთის რესპუბლიკის ქალაქ ანტალიაში იმართება. ღონისძიება თურქეთის რესპუბლიკის უზენაესი სააპელაციო სასამართლოს გენერალურმა პროკურორმა მუჰსინ შენთურქმა და ანტალიის გუბერნატორმა ჰულუსი შაჰინმა გახსნეს. ფორუმის ფარგლებში სიტყვით გამოვიდა საქართველოს გენერალური პროკურორი გიორგი გვარაკიძე. საქართველოს გენერალური პროკურატურის საერთაშორისო ურთიერთობების დეპარტამენტის უფროსმა გიორგი მიქავამ კი საქართველოს გამოცდილების შესახებ პრეზენტაცია წარადგინა თემაზე: „ტერორიზმის დაფინანსებისა და ფულის გათეთრების წინააღმდეგ ბრძოლა და დანაშაულებრივი შემოსავლების კონფისკაცია“. სამუშაო ფორუმის ფარგლებში საქართველოს გენერალური პროკურორი გიორგი გვარაკიძე სხვადასხვა ქვეყნის გენერალურ პროკურორებსა და შესაბამისი უწყებების წარმომადგენლებთან ორმხრივ შეხვედრებს გამართავს. ანტალიაში გამართულ ფორუმს  საქართველოს პროკურატურის დელეგაცია სპეციალური მოწვევით, სტუმრის სტატუსით ესწრება. ბალკანეთის ქვეყნების გენერალური პროკურორების ფორუმს ასევე ესწრებიან პროკურორთა საერთაშორისო ასოციაციის (IAP) გენერალური მდივანი, Eurojust-ის პარტნიორებთან ურთიერთობის საბჭოს თავმჯდომარე, ალბანეთის, სლოვენიის, მონტენეგროს, რუმინეთის, ჩრდილოეთ მაკედონიის, კოსოვოსა და თურქეთის რესპუბლიკის გენერალური პროკურორები, აგრეთვე პროკურატურის სხვა მაღალი თანამდებობის პირები.

27 ოქტომბერი, 2026

პროკურატურამ დამამძიმებელ გარემოებებში ჩადენილი ყოფილი მეუღლის განზრახ მკვლელობის ფაქტზე დაკავებულს ბრალდება წარუდგინა

საქართველოს პროკურატურამ დამამძიმებელ გარემოებებში ჩადენილი ყოფილი მეუღლის განზრახ მკვლელობის ფაქტზე დაკავებულს ბრალდება წარუდგინა. საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ 25 ოქტომბერს, ფოთში, ბრალდებულმა, ქალისა და მამაკაცის თანასწორობის შეუწყნარებლობის გამო, ყოფილი მეუღლე ბალიშის გამოყენებით გაგუდა. სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 109-ე მუხლის „თ“ და „კ“ ქვეპუნქტებით (განზრახ მკვლელობა ქალისა და მამაკაცის თანასწორობის შეუწყნარებლობის გამო, ოჯახის წევრის მიმართ) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს. პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.

26 ოქტომბერი, 2026

პროკურატურის მიერ წარდგენილი მტკიცებულებების საფუძველზე დამამძიმებელ გარემოებებში ჩადენილი განზრახ მკვლელობის ფაქტზე ორ ბრალდებულს უვადო თავისუფლების აღკვეთა მიესაჯა

მცხეთის რაიონულმა სასამართლომ სრულად გაიზიარა პროკურატურის მიერ წარდგენილი მტკიცებულებები და დამამძიმებელ გარემოებებში ჩადენილი განზრახ მკვლელობის ფაქტზე ორი ბრალდებული დამნაშავედ ცნო. სასამართლო პროცესზე გამოკვლეული მტკიცებულებებით დადასტურდა, 2026 წლის 10 მარტს, დუშეთის მუნიციპალიტეტის სოფელ ბაგაში, ბრალდებულებმა შურისძიების მოტივით, განსაკუთრებული სისასტიკით, მეუღლის თანდასწრებით, დაზარალებულს ცეცხლსასროლი იარაღიდან გასროლით ჭრილობა მიაყენეს და შემთხვევის ადგილიდან მიიმალნენ. მიღებული დაზიანების შედეგად დაზარალებული გარდაიცვალა. ასევე, ბრალდებულებმა საფრთხე შეუქმნეს შემთხვევის ადგილზე მყოფი გარდაცვლილის მეუღლის სიცოცხლეს და ჯანმრთელობას. სამართალდამცველებმა ბრალდებულები 14 მარტს დააკავეს. მათ ბრალდება საქართველოს სისხლის სამართლის კოდექსის 109-ე მუხლის ,,ბ“, „ი“, „მ“ და „პ“ ქვეპუნქტებით (განზრახ მკვლელობა, ისეთი საშუალებით, რაც საფრთხეს უქმნის სხვის სიცოცხლეს და ჯანმრთელობას, ჯგუფურად, განსაკუთრებული სისასტიკით და არაერთგზის) წარედგინათ.  სასამართლომ ორივე ბრალდებული დამნაშავედ ცნო წარდგენილ ბრალდებებში და სასჯელის სახედ და ზომად ორივეს უვადო თავისუფლების აღკვეთა განუსაზღვრა. 

26 ოქტომბერი, 2026

საქართველოს პროკურატურამ ჯგუფური მოქმედების ორგანიზებისა და მასში მონაწილეობის მომზადების ფაქტზე ორ არასრულწლოვანს ბრალდება წარუდგინა

საქართველოს პროკურატურამ ჯგუფური მოქმედების ორგანიზებისა და მასში მონაწილეობის მომზადების ფაქტზე ორ არასრულწლოვანს ბრალდება წარუდგინა. შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულებმა 2026 წლის აპრილი-მაისის თვეში სოციალურ ქსელის მეშვეობით გაიცნეს ერთმანეთი და განიზრახეს სკოლაზე თავდასხმის, რბევისა და ძალადობის ორგანიზება და მასში მონაწილეობა. კერძოდ, მათ შეარჩიეს თბილისში მდებარე კონკრეტული სკოლა, შეისწავლეს მისი შიდა განლაგება, გადაწყვიტეს რომ სკოლის წინ დაემონტაჟებინათ ყალბი ასაფეთქებელი მოწყობილობა, რაც საშუალებას მისცემდათ შეუმჩნევლად შეჭრილიყვნენ სკოლაში, დაერბიათ სკოლის შიდა ტერიტორია და იარაღის გამოყენებით სკოლაში მყოფი პირებისთვუს მიეყენებინათ ჯანმრთელობის დაზიანებები. ამ მიზნით მათ შეიძინეს სხვადასხვა ნივთები და შექმნეს ყველა პირობა დანაშაულის ჩასადენად, თუმცა განზრახვის სისრულეში მოყვანა ვერ მოახერხეს, რადგან მათი ქმედება გამოვლენილ იქნა სამართალდამცავი ორგანოს თანამშრომლების მიერ. დაკავებულებს ბრალდება საქართველოს სისხლის სამართლის კოდექსის 18,225-ე მუხლის პირველი და მეორე ნაწილებით (ჯგუფური მოქმედების ორგანიზებისა და მასში მონაწილეობის მომზადება, რასაც თან უნდა მოჰყოლოდა ძალადობა და რბევა, სხვისი ნივთის დაზიანება და განადგურება, იარაღის გამოყენება) წარედგინათ, რაც სასჯელის სახედ ექვსიდან ცხრა წლამდე თავისუფლების აღკვეთას ითვალისწინებს. ერთ-ერთ არასრულწლოვან ბრალდებულს აღკვეთის ღონისძების სახით პატიმრობა შეეფარდა, ხოლო მეორე ბრალდებულის მიმართ პროკურატურა შუამდგომლობით სასამართლოს აღკვეთის ღონისძიების გამოყენებაზე კანონით დადგენლ ვადაში მიმართავს. საქმეზე გამოძიება გრძელდება.

25 ოქტომბერი, 2026

საქართველოს პროკურატურის თანამშრომლებისთვის თაღლითობის საქმეებზე გამოძიებისა და სამართლებრივი შეფასების საკითხებზე სასწავლო კურსი ჩატარდა

საქართველოს პროკურატურის თანამშრომელთა კვალიფიკაციის ამაღლების მიზნით, საქართველოს გენერალური პროკურატურის პროფესიული განვითარების ცენტრის ორგანიზებით თაღლითობის საქმეებზე გამოძიებისა და სამართლებრივი შეფასების პრაქტიკულ გამოწვევებზე ოთხდღიანი სასწავლო კურსი ჩატარდა. კურსის მიმდინარეობისას საუბარი შეეხო თაღლითობის დანაშაულის გამოძიების მიმართულებით არსებულ პრაქტიკულ გამოწვევებს, არსებული პრაქტიკის გაზიარებას, სამართლებრივ ასპექტებსა და საგამოძიებო პრაქტიკის დახვეწის საკითხებს დაეთმო. სწავლებას საქართველოს გენერალური პროკურატურის საპროკურორო საქმიანობაზე ზედამხედველობისა და სტრატეგიული განვითარების დეპარტამენტის წარმომადგენლები უძღვებოდნენ, რომლის ფარგლებში ყურადღება გამახვილდა ისეთ მნიშვნელოვან თემებზე, როგორიცაა: თაღლითობის სამართლებრივი ჩარჩო, ორგანიზებული თაღლითობის გამოძიება, პრაქტიკაში ყველაზე მეტად გავრცელებული თაღლითობის ტიპები, თაღლითური სქემები და მათი დაშლა, მტკიცებულებათა მოპოვება და გონივრულ ეჭვს მიღმა სტანდარტი, შეჯიბრებითობის პრინციპი თაღლითობის საქმეებში. სასწავლო კურსი მიზნად ისახავდა თაღლითობის საქმეთა გამოძიებისა და შესაბამისი სამართლებრივი შეფასებისას წამოჭრილი პრობლემური საკითხების განხილვას, საუკეთესო პრაქტიკის გაზიარებასა და მათი გადაჭრის ეფექტიანი გზების ჩამოყალიბებას. აღსანიშნავია რომ თაღლითობის დანაშაულის წინააღმდეგ ეფექტიანი ბრძოლა, საქართველოს პროკურატურის ერთ-ერთ პრიორიტეტს წარმოადგენს, აღნიშნულიდან გამომდინარე პროკურორთა კვალიფიკაციის ამაღლებისა და გადამზადების პროცესი მომავალშიც აქტიურად გაგრძელდება.

25 ოქტომბერი, 2026