თუ გსურთ დასაქმდეთ სახელმწიფო სამსახურში, გახდეთ დანაშაულის წინააღმდეგ ბრძოლისა და მართლმსაჯულების სისტემის აქტიური მონაწილე; გაქვთ მოტივაცია და პასუხისმგებლობის მაღალი გრძნობა - საქართველოს პროკურატურა თქვენი კარიერული განვითარების საუკეთესო შესაძლებლობაა. მიღებული სამუშაო გამოცდილება, პროფესიონალ გუნდთან მუშაობა, საჭიროებებზე მორგებული სასწავლო პროგრამები და მენტორების სისტემა მაქსიმალურად დაგეხმარებათ საკუთარი კარიერული მიზნებისა და ამოცანების მიღწევაში. საქართველოს პროკურატურაში დაფასებულია თითოეული თანამშრომლის როლი და ინიციატივა. გაწეული საქმიანობისა და მიღწევებისთვის ხდება წახალისება. ორგანიზაციისათვის მნიშვნელოვანია გენდერული ბალანსის დაცვა. შექმნილია თანაბარი სამუშაო გარემო და შესაძლებლობები თანამშრომელთა ეთნიკური, ეროვნული კუთვნილებისა და რელიგიური მრწამსის მიუხედავად.

საქართველოს პროკურატურაში დასაქმება ძირითადად ღია კონკურსების გზით ხორციელდება. ახალი თანამშრომლების შერჩევის პროცესი ვაკანსიის შესაბამისად ინდივიდუალურად იგეგმება. შერჩევის პროცედურები არის ობიექტური, გამჭვირვალე და სამართლიანი. იურიდიული სპეციალობის პირებს დასაქმების სხვადასხვა შესაძლებლობა ეძლევათ, მათ შორის: სტაჟირების კონკურსი და სტაჟირების გავლა; კონკურსის გზით პროკურორის/გამომძიებლის თანამდებობაზე დანიშვნა; პროკურორის/გამომძიებლის თანამდებობის დაკავება გენერალური პროკურორის მოტივირებული გადაწყვეტილებით, თუ პირი აკმაყოფილებს ,,პროკურატურის შესახებ“ საქართველოს ორგანული კანონით დადგენილ მოთხოვნებს. საჯარო მოხელეებისათვის განკუთვნილ ვაკანტურ პოზიციებზე კანდიდატთა შერჩევა ხორციელდება კონკურსის გზით, ,,საჯარო სამსახურის შესახებ“ საქართველოს კანონის შესაბამისად. განაცხადების მიღება წარმოებს ელექტრონულად, საჯარო სამსახურის ბიუროს ვებ-გვერდის www.hr.gov.ge მეშვეობით. გამოცხადებული ვაკანსიების შესახებ დეტალური ინფორმაცია ეტაპობრივად ახლდება საქართველოს პროკურატურის ვებ-გვერდზე. დეტალური ინფორმაციებისათვის, გთხოვთ, ეწვიოთ ,,ვაკანსიები“-ს განყოფილებას.