სენაკის რაიონული პროკურატურის პროკურორებმა სახელმწიფოს კუთვნილი სასოფლო-სამეურნეო დანიშნულების მიწის ნაკვეთების მისაკუთრების ფაქტებზე ამნისტიის კანონის ამოქმედებასთან დაკავშირებით მარტვილში, სენაკსა და აბაშაში დაინტერესებულ მოსახლეობასთან საინფორმაციო შეხვედრები გამართეს. 

პროკურორებმა მოსახლეობას ახალ კანონთან დაკავშირებულ სამართლებრივ საკითხებზე დეტალური ინფორმაცია მიაწოდეს და მათთვის საინტერესო შეკითხვებზე ამომწურავი პასუხები გასცეს, კერძოდ, განუმარტეს თუ რა ტიპის მიწის ნაკვეთებზე ვრცელდება კანონი და ვის ეხება ის; ასევე, თუ რა ვადებში და რა ფორმით შეუძლიათ სახელმწიფოსთვის ზიანის ანაზღაურება პირებს, რომლებიც ჩადენილ დანაშაულს აღიარებენ.

ამნისტიის შესახებ ახალი კანონის მიზანს იმ ათასობით მოქალაქის სისხლის სამართლის პასუხისმგებლობისგან გათავისუფლება წარმოადგენს, რომლებმაც სახელმწიფოს კუთვნილი მიწის ნაკვეთები დანაშაულებრივი გზით მიისაკუთრეს. ამნისტიის კანონის გამოყენებით, პირი ნასამართლევად არ ჩაითვლება.

დეტალური ინფორმაცია სასოფლო-სამეურნეო დანიშნულების მიწის ნაკვეთების მისაკუთრების ფაქტებზე ამნისტიის კანონის შესახებ იხილეთ აქ.