საქართველოს პროკურატურის და გაეროს ქალთა ორგანიზაციის თანამშრომლობის ფარგლებში, თემაზე - „გენდერული აუდიტის რეკომენდაციების შესრულების ხელშეწყობა და სამუშაო ადგილზე სექსუალური შევიწროებაზე რეაგირების მექანიზმის გაძლიერება საქართველოს პროკურატურაში“ ერთობლივი სამუშაო შეხვედრა მიმდინარეობს, რომელსაც პროკურატურის და გაეროს ქალთა ორგანიზაციის წარმომადგენლები ესწრებიან.

შეხვედრის მიზანს სექსუალურ შევიწროებაზე რეაგირების მექანიზმის და უწყების გენდერული მეინსტრიმინგის პრიორიტეტების შესახებ მსჯელობა წარმოადგენს.

ორდღიანი შეხვედრის ფარგლებში, მონაწილეები განიხილავენ ისეთ საკითხებს, როგორიცაა 2021 წელს საქართველოს პროკურატურაში ჩატარებული თანამონაწილეობითი გენდერული აუდიტის რეკომენდაციების შესრულების სტატუსი, სექსუალურ შევწროვებაზე რეაგირების მექანიზმის დანერგვა და მისი ეფექტიანი აღსრულება.   

შეხვედრაზე პოზიტიურად შეფასდა საქართველოს პროკურატურის მიერ შესრულებული რეკომენდაციები და პროკურატურაში გენდერული მეინსტრიმინგის გაძლიერებისკენ მიმართული ღონისძიებები. თანამონაწილეობითი გენდერული აუდიტის რეკომენდაციების შესაბამისად, გენდერული თანასწორობის საკითხების ინტეგრირება საქართველოს პროკურატურის განვითარების 2022 – 2027 წლის სტრატეგიაშია დაგეგმილი. 2021-2022 წლებში საქართველოს პროკურატურა უწყებისთვის გენდერული თანასწორობის სტრატეგიის და სამოქმედო გეგმის შემუშავებას და ასევე, გენდერულ საკითხებზე მომუშავე სპეციალური სამუშაო ჯგუფის შექმნას გეგმავს.

გენდერული აუდიტის ძირითადი ამოცანაა მოახდინოს ორგანიზაციის გენდერული ანალიზი და შეისწავლოს უწყებაში არსებული გენდერული პოლიტიკა, გამოავლინოს როგორ აღიქმება თანამშრომლების მიერ გენდერული თანასწორობის საკითხი და რამდენად პრიორიტეტულია იგი უწყების პოლიტიკის, საქმიანობის თუ შიდა ორგანიზაციულ დონეებზე. ასევე, გენდერული აუდიტის ამოცანას წარმატებული პრაქტიკის შესწავლა და არსებული გამოწვევების დასაძლევად რეკომენდაციების შემუშავება წარმოადგენს.

სამუშაო შეხვედრა გაეროს ქალთა ორგანიზაციის პროექტის „კარგი მმართველობა გენდერული თანასწორობისთვის საქართველოში“ ფარგლებში იმართება, რომელიც ნორვეგიის საგარეო საქმეთა სამინისტროს მიერაა მხარდაჭერილი.