საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენის, შენახვისა და წინასწარი შეთანხმებით ჯგუფის მიერ უკანონო რეალიზაციის მომზადების ფაქტებზე უცხო ქვეყნის ორ მოქალაქეს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიებით დადგინდა, რომ უცხო ქვეყნის მოქალაქემ უკანონოდ შეიძინა და ინახავდა განსაკუთრებით დიდი ოდენობით, 2913,04 გრამ ნარკოტიკულ საშუალებას, რომელიც შეიცავს 1815,315 გრამ კოკაინს. ბრალდებულმა ასევე უკანონოდ შეიძინა და ინახავდა ათასობით აბს, რომელიც შეიცავს განსაკუთრებით დიდი ოდენობით, 945,817 გრამ, ნარკოტიკულ საშუალება მდმა-ს.

ბრალდებული უცხო ქვეყნის სხვა მოქალაქესთან ერთად, ჯგუფურად ახდენდა განსაკუთრებით დიდი ოდენობით ნარკოტიკული საშუალება კოკაინის და მდმა-ს უკანონო რეალიზაციისთვის მომზადებას, რაც სამართალდამცავი პირების მიერ აღიკვეთა.

სამართალდამცველებმა ბრალდებულები მიმდინარე წლის 6 ივლისს ბათუმში დააკავეს. მათ ბრალდება საქართველოს სისხლის სამართლის კოდექსის 260-ე მუხლის მესამე ნაწილის ,,ა’’ ქვეპუნქტითა (განსაკუთრებით დიდი ოდენობით ნარკოტიკული საშუალების უკანონოდ შეძენა და შენახვა) და 18,260-ე ტერცია მუხლის მეხუთე ნაწილის ,,ბ’’ და მეექვსე ნაწილის ,,ა’’ ქვეპუნტებით (ჯგუფურად, განსაკუთრებით დიდი ოდენობით ნარკოტიკული საშუალების უკანონო რეალიზაციის მომზადება) წარედგინათ, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურის შუამდგომლობის საფუძველზე ბრალდებულებს აღკვეთის ღონისძიების სახით პატიმრობა შეეფარდათ.