ნაფიცმა მსაჯულებმა მალხაზ კობაური დამნაშავედ ცნეს ყველა წარდგენილ ბრალდებაში

სიახლეები

25 მარტი, 2019

ხადას ხეობაში სმიტების ოჯახის სამი წევრის მკვლელობაში ბრალდებული მალხაზ კობაურის საქმის პროკურორის ზაზა დათუკიშვილის განცხადებით, ბრალდების მხარე სასჯელის დანიშვნის სხდომაზე მხარს დაუჭერს უვადო თავისუფლების აღკვეთას.

„პირველ რიგში უნდა აღვნიშნო, რომ ნაფიც მსაჯულთა სასამართლოს მიერ, აბსოლუტურად ყველა წარდგენილ ბრალდებაში მალხაზ კობაური ცნობილი იქნა დამნაშავედ და ხაზგასასმელია, რომ ყველა წარდგენილ ბრალდებაში ნაფიცმა მსაჯულებმა გადაწყვეტილება გამოიტანეს ერთხმად. აქვე მინდა განვმარტო, რომ ბუნებრივია, ეს არ იყო მოულოდნელი გადაწყვეტილება. ბრალდების მხარე იმ დღიდან, როდესაც პასუხისგებაში მიეცა მალხაზ კობაური, აღნიშნავდა, რომ საქმეზე მოპოვებული იქნა არაერთი მტკიცებულება, რომელიც ერთობლიობაში ცალსახად ადასტურებდა, რომ აღნიშნული დანაშაული ჩაიდინა მალხაზ კობაურმა“,- განაცხადა ზაზა დათუკიშვილმა.

ამასთან, პროკურორის განმარტებით, ნაფიცმა მსაჯულებმა მალხაზ კობაური დამნაშავედ ცნეს ბრალდების მხარის მიერ წარდგენილ ყველა ბრალდებაში.

„მინდა მადლობა გადავუხადო ნაფიც მსაჯულთა სასამართლოს თითოეულ წევრს, ამ შემადგენლობას, ვინაიდან მართლაც ღირსეულად შეძლეს და შეასრულეს მათზე დაკისრებული მოვალეობა და საამაყოა, რომ ჩვენ გვყავს საზოგადოების ასეთი ღირსეული წევრები. ასევე მინდა აღვნიშნო, რომ სხდომაზე დაცვის მხარემ შესთავაზა ნაფიც მსაჯულებს ალტერნატიული ვერდიქტი, რომელიც გულისხმობდა, რომ კობაური გამართლებულიყო ჩვენ მიერ წარდგენილ ყველა ბრალდებაში და გამტყუნებულიყო დანაშაულის შეუტყობინებლობაში, რადგან დაცვის მხარე ავითარებდა ვერსიას, რომ თითქოს ის მხოლოდ შეესწრო ამ დანაშაულს, ხოლო მკვლელობა მას არ ჩაუდენია. ბუნებრივია, დაცვის მხარის მიერ ამ ნაწილში მიღებულ იქნა გამამართლებელი ვერდიქტი, ხოლო ამის შემდეგ მათ ერთხმად ცნეს დამნაშავედ ბრალდების მხარის მიერ წარდგენილ ყველა ბრალდებაში“- აღნიშნა პროკურორმა.

ზაზა დათუკიშვილის თქმით, სასამართლო სასჯელს ოთხშაბათს გამოაცხადებს.

„რაც შეეხება სასჯელის ნაწილს, 27 მარტს, 12:00 საათზე ჩანიშნულია სასჯელის დანიშვნის სხდომა, სადაც მოსამართლე გამოაცხადებს სასჯელს. ვინაიდან ჩადენილია უმძიმესი დანაშაული, მოკლულია სამი ადამიანი, მათ შორის 4 წლის ბავშვი, მოტივი ამ დანაშაულის არის შეუწყნარებელი და გაუგონარი, ბრალდების მხარეს მიაჩნია, რომ ერთადერთი სამართლიანი სასჯელი იქნება უვადო თავისუფლების აღკვეთა და სასჯელის დანიშვნის სხდომაზე ჩვენ მხარს დავუჭერთ უვადო თავისუფლების აღკვეთას”,- განაცხადა პროკურორმა.

ხადას ხეობაში სმიტების ოჯახის სამი წევრის მკვლელობაში ბრალდებულ მალხაზ კობაურს ნაფიცმა მსაჯულებმა გამამტყუნებელი ვერდიქტი გამოუტანეს. კობაური ნაფიცმა მსაჯულებმა წარდგენილ ყველა ბრალში ერთხმად დამნაშავედ სცნეს, მათ შორის გაუპატიურებაში.

მალხაზ კობაურს ბრალი სისხლის სამართლის კოდექსის 109-ე მუხლის პირველი ნაწილის „გ“, მე-2 ნაწილის „ბ“, მე-3 ნაწილის „ა“ და „ბ“ ქვეპუნქტებით და 137-ე მუხლის პირველი ნაწილით ჰქონდა წარდგენილი, რაც განზრახ მკვლელობას სხვა დანაშაულის გაადვილებისა და დაფარვის მიზნით, სამი პირის განსაკუთრებული სისასტიკით მკვლელობას, წინასწარი შეცნობით არასრულწლოვნის მიმართ მკვლელობასა და გაუპატიურებას გულისხმობს. აღნიშნული დანაშაული 16-დან 20-წლამდე, ან უვადო პატიმრობას ითვალისწინებს.

სხვა სიახლეები

საქართველოს პროკურატურის და ამერიკის შეერთებული შტატების საელჩოს რეგიონული უსაფრთხოების სამსახურის მიერ ერთობლივად ჩატარებული ღონისძიების შედეგად გამოვლენილია ახალი დანაშაულებრივი ჯგუფის წევრები, რომლებიც ამერიკის შეერთებულ შტატებში თავშესაფრის მისაღებად საქართველოს მოქალაქეებს ყალბ ისტორიებს და დოკუმენტაციას უქმნიდნენ

საქართველოს პროკურატურამ დანაშაულებრივი ჯგუფის მიერ საქართველოს მოქალაქის უცხო ქვეყანაში უკანონოდ დარჩენისთვის ხელშეწყობის, საქართველოს მოქალაქისთვის... ...

14 ივლისი, 2026

პროკურატურის მიერ წარდგენილი მტკიცებულებების საფუძველზე, დიდი და განსაკუთრებით დიდი ოდენობით ნარკოტიკული საშუალების უკანონო შეძენა, შენახვის, რეალიზაციის, ნარკოტიკული საშუალების შემცველი მცენარის უკანონო დათესვა, მოყვანა, კულტივირების და მცენარე „კანაფის“ უკანონო რეალიზაციის ხელშეწყობის ფაქტებზე ბრალდებულს 17 წლით თავისუფლების აღკვეთა მიესაჯა

თბილისის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და დიდი და განსაკუთრებით დიდი ოდენობით ნარკოტიკული საშუალები... ...

13 ივლისი, 2026

პროკურატურის მიერ წარდგენილი მტკიცებულებების საფუძველზე, დიდი ოდენობით ნარკოტიკული საშუალების უკანონო შეძენა, შენახვის და რეალიზაციის ფაქტებზე ბრალდებულს 16 წლით თავისუფლების აღკვეთა მიესაჯა

ხელვაჩაურის რაიონულმა სასამართლომ სრულად გაიზიარა პროკურატურის მიერ წარდგენილი მტკიცებულებები და დიდი ოდენობით ნარკოტიკული საშუალების უკანონო შეძენა,... ...

13 ივლისი, 2026