განსაკუთრებით დიდი ოდენობით ნარკოტიკული საშუალების შეძენა-შენახვასა და საქართველოში ჯგუფურად უკანონოდ შემოტანის ორგანიზებაში ბრალდებულს 17 წლით თავისუფლების აღკვეთა მიესაჯა

2018-11-05 10:51:23
თბილისის საქალაქო სასამართლომ გაიზიარა ბრალდების მხარის მიერ წარდგენილი მტკიცებულებები და განსაკუთრებით დიდი ოდენობით ნარკოტიკული საშუალების უკანონო შეძენა-შენახვასა და წინასწარი შეთანხმებით ჯგუფის მიერ საქართველოში უკანონოდ შემოტანაში ბრალდებული, ირანის ისლამურ რესპუბლიკის მოქალაქე ბ.გ. დამნაშავედ ცნო. 
სასამართლო პროცესზე გამოკვლეული მტკიცებულებებით დადასტურდა, რომ ბ.გ-მ, ირანის ისლამურ რესპუბლიკაში ყოფნისას უკანონოდ შეიძინა და შეინახა განსაკუთრებით დიდი ოდენობით 531,3626 გრ. ნარკოტიკული საშუალება ჰეროინის შემცველი ნივთიერება და მისი საქართველოში უკანონო შემოტანის ორგანიზება მოაწყო. 2018 წლის 7 თებერვალს, მან ნარკოტიკული საშუალება ფუთებად დააფასოვა და საქართველოში უკანონოდ შემოტანის მიზნით სხვადასხვა ოდენობით, წინასწარი შეთანხმებით ა.ბ-ს, მ.ყ.-ს, ფ.ჰ.-ს და საკუთარ სხეულში მოათავსა, ხოლო 2018 წლის 8 თებერვალს, სასაზღვრო-გამშვებ პუნქტ სადახლოს მეშვეობით, ორგანიზება გაუწია განსაკუთრებით დიდი ოდენობით - 531,3626 გრ. ნარკოტიკული საშუალება ჰეროინის საქართველოში უკანონოდ შემოტანას.
სამართალდამცველებმა ბ.გ. დანაშაულებრივი ჯგუფის სხვა წევრებთან ერთად 2018 წლის 9 თებერვალს, ქ.თბილისში დააკავეს. მას ბრალდება საქართველოს სისხლის სამართლის კოდექსის 260-ე მუხლის მე-6 ნაწილის „ა“ ქვეპუნქტით და 262-ე მუხლის მე-2 ნაწილის „ბ“ და მე-4 ნაწილის „ა“ ქვეპუნქტებით (განსაკუთრებით დიდი ოდენობით ნარკოტიკული საშუალების უკანონო შეძენა-შენახვა და განსაკუთრებით დიდი ოდენობით ნარკოტიკული საშუალების წინასწარი შეთანხმებით ჯგუფის მიერ საქართველოში უკანონო შემოტანა) წარედგინა.  
დანაშაულებრივი ჯგუფის წევრებმა ა.ბ-მ, მ.ყ.ყ-მ და ფ.ქ.ჰ-მ, აღიარეს დანაშაული და მხარეთა შორის საპროცესო შეთანხმების საფუძველზე მათ  თავისუფლების აღკვეთა განესაზღვრათ. 
 თბილისის საქალაქო სასამართლომ ბ.გ. დამნაშავედ ცნო წარდგენილ ბრალდებებში და სასჯელის სახედ და ზომად 17 წლით თავისუფლების აღკვეთა განუსაზღვრა.